شمايل

مصايب الدُنيا والزمن البغيّر
قاسي تبدل المن تبه خيّر
شمايلاً فينا يام حُسناً بحيّر
عليها بغني بالبحر القصيّر
****
رجال من قمنا يام ديساً مكلّق
قلبنا معبى بالفرسة ومغلّق
لِسانا مكجْن النضم المطلّق
وماندهونا فوق لستة صعلّق
****
ازُكري الفينا بالقول والعمايل
دُغري دربنا مابيمشيبو مايل
بتفنى الجته وتدوم الشمايل
وكم سوينا في العُزال جمايل
****
نضيف تاريخنا وإن درتي الادله
ما زكرونا بي ياريت وإلا
كتار خلق الله إلا آمثالنا قِله
لا تدهنسنا..لا..مسكولنا زِله
****
مابنقمّح الفي الخير عشامه
وفي خد القيم ختينا شامه
قلوبنا نضيفة من دنس الغشامه
ولايقه علينا كُل خِصل النشامه
****
ما بعدونا في القاسيات اواخر
لا تجهْلنا لا سخر بينا ساخر
يمين اولاد قبايلن خيره زاخر
وهيلنا التقوي والعز والمفاخر
****
رزينة ألسنا ما بكتر كلامه
ومرسية روحنا في بر السلامه
بتابى الغيبة والهجاء والملامه
وشهادة الزور واكل مال اليتامى
****
نفوسنا ابيه مابنفوت حدودنا
وإن عاهدنا مابنخون عهودنا
ورثنا الحكمة والعفو من جدودنا
وقدر ماغضبنا ماتعابت ردودنا
****
صفات العزه يا المبروكه هيلنا
ويوم الشوره مابحتار دليلنا
اسألي عننا البحفظ جميلنا
 سودانية نقدل فوق عديلنا