الاطلال
يا حليل سمحة البسمة التضوي بروقه
الشم في خدوده ومن ثناها شِروقه
الشاويني شوقه ونغجلتني حِروقه
طلعته يوسفية ويعرُبيه عِروقه
***
اطلال المحبه آلى لِقانا تنادي
مفتقداكي يانغم الكنار الشادي
اشواقى آلبناتلن في القليب الصادي
حنّلك حنين آهلي الغبش للرادي
***
كل ماقيف عليهن بالدموع إتبلا
واسرح وحيلي يخدر والفكر يتشلا
يالصاين غرامك وعنو مابتخلا
ماقايل بفارقك والزمن بتغلا
***
ياروحي البتلدغ في الفؤاد افعاكي
مره حياتي دونك وربي لي يرعاكي
ماتنسيني يالمالكه الحواس اوعاكي
وارجوك خلي بالك من فؤادي معاكي
***
يازهري البريدك ومن عطورك فُلي
مشتاقلك تعودي وفي سمايا تطُلي
من لوعة فراقك وآ عزابي وزُلي
بقْلد طيفك ابكي وبيك اونّس ضُلي
***
بشكيلك ممحن ياغرامي واسي
من هماً يودر كاد إشيّب راسي
إتنين إبتلنّي وجرّعني مأسي
حسادي العوازل والزمان القاسي
***
بلاك العيشه مره ويام موايق زِله
مترطش موهدب لا اهل لاخِله
من مافُتي يالسمحه وهجرتي الحِله
روحي عليكي حزنت وإحتوتني العِله
***
شوقاً لي عيونا وطلته ومحياها
والبسمه البتنزِر بالمطر من فاها
اربعه ياخلايق بشكي مِن مُر داها
بعدها والمغايس والحزن والاها
***
يال تريانه عفه وإحترام ورزانا
بعدك نار وقاسي وبي لهيبو ازانا
انا والنجمه والقمر البلالي حزانا
في البكاء والقصايد والتمني عزانا
***
طريت ايامي جمبك والليالي الغُره
يابت العواهل والإصول الحُره
شوقك وإبتعادك جرّعني المُره
بشكي من العوازل والحظوظ الطُره
***
اجمل اغاني في نمي القلم خطْاها
فوقك يالجمالك بالدرر غطْاها
وحات العلا قامتك وحاشا ما وطْاها
بي ريدك متيّم ولاحق امات طه
***
يالي جرحي بي طيبة لهيجك حايكة
فيكي براءة الطفلة وتقاكي ملايكة
مادام القمر طلعو الخواجه ولايكا
مابلحق جمالك يالدروبك شايكة
***
الحياء والتعفف والتواضع زانا
والوسمي البيهطل في الربيع امزانا
قبلان ابقى سلة مهملات احزانا
ترمي شقاها فوقي وادمنن اوزانا
***
البي ريده والصد الكتر عاقتنا
لي درب المواجع والسهر ساقتنا
يال في دروب غرامك كل محن لاقتنا
رفقاً بينا إتحملنا فوق طاقتنا
تعليقات
إرسال تعليق