وين
ستة ايام مفارقك وقلبي هدا البين
اندب حظي واشكي من الزمان الشين
روحي معاكا سارحه وماغفت لي عين
احترت وبلاك القى الصبر من وين
***
وين ياخلاصة التوت والعنب والتين
لي ايام معزب ومن فراقك انين
كل ماطراكا يا القلبك رؤف وحنين
تلمع دمعة الشوق في العيون وتبين
***
وين يالبي محاسنك للجمال متأله
ارهق روحي بعدك والفكر متبله
يا الفرقة عيونك لي لبيبي تدله
ارحم قلبي مشغولبك عليك متوله
***
وين يا قايد الريم الموالف البيد
ماك عارفني مغرم وشوقي ليكا شديد
يا الحسنك اسرني وما بيوفي قصيد
شوفتك عندي اجمل من هلال العيد
***
وين ياعصارة الروعة وامير الخود
الايام بدونك كان صفت لي سود
إمتى الدنيا تبسم والليالي تجود
وشملك يجمعو النزل تبارك هود
***
وين يا المنك اتعلمت صدق القافية
واهديتك روائع من مشاعر وافية
يشهد ربي علام الضماير الخافية
نعمة قربك اغلي من النظر والعافية
***
وين يا اليك معزه واحترام وسيادة
يابلسم جروحي الماتوجد في عيادة
يالفايت حواري الكون سماح وريادة
بيكا عيوني مليانة ومليتة زيادة
***
وين يالديمة بشتقالك محل ما آفوت
ومالي مأوي غيرك لامن افنى واموت
دونك يا الغرامك في القلب منحوت
يسألني الله مابطيب المنام والقوت
***
وين يا العالي قدرك وحايز اسمى مكان
ويا طبي وشفايا وعافية الابدان
النيل كان حكيتلو الكاتمو في الوجدان
يعكر ويبقي مالح ويتفجر بركان
***
وين يا المن جبينك نور شمسنا ببين
ويا المابنسى سيرتك في العسر واللين
غايتو تراني صابر واسأل الله يعين
وستة ايام بلاك يا الغالي ستة سنين
تعليقات
إرسال تعليق