حيره

معاك إحترته يا الأمرك غبني 
وهديتك ولسه بتقفي وتغني
ازيتني ازيه ما تنبابه ظني
ودوام بتلاهي بي آم حسنن فتني
‎*****
زمان وصيتو لاكن كيف هدايتو
وقتلو الراعي مسؤل من رعايتو 
دريب الريده من ما تشق بدايتو
 قدر ما تمشي ما بتوصل نهايتو

*****

وسلكتو وازيتني بدروبن طويله 
وروحي تراها بي سببك عليله
عليها عصرته وإتحيّر دليله‎ 
 وانا المسكين ومالي اي حيله

*****

عيوني مساهرة واتناست مبيتا
ووآطول ليله يا النارك وطيتا
قتلك اخيرلك إن تبته وختيتا
 ووصيتي ضربها الحيطة ونسيتا

*****

يا الألمك ظهر في آعضاي ونمي
رفقاً بيا يكفي اساي وغمي
شيل شيلتك براك دام كست همي
 يا الفي الحب وقعته وماك مسمي

*****

وياروحي المعاك اصبحت حاير
ماك عارفه المحبه كتابه جاير
شن دايرابه غير تجني المراير
 وعنتر وقيس قبل فيهن سناير

*****

مالك ومال عزاب الريد وغشو
دام القبلي في طرقاتو طشو
ماتخليلو صبرن إلمبو قشو
 وشوية موية يحفظ بيها وشو

*****

خوفي يكون متل سنمار جزانا
وتبقي الحكمة في ياريت عزانا
حشيمة المنطق الخلاقه زانا
 من شفتيها فارقتي الرزانا

*****

اقولك لا لا تطريها وتؤوبي
وحد ماتقوي ترميني وتزوبي
سؤال يالمنك إتكشفت عيوبي
 عليك إسم الله مالك مابتتوبي

*****

تجري شريطه كل ما الليل إليّل
تعدي نجومو وإفضلك قليّل
تراني معني بي سببك عليّل
 هسي العامله فوق روحك قليّل